Meistaraþjálfun og þythokkýborð

Fór í ræktina í morgun og var mættur um kl. 9. Hafði fengið mér smá bjór og pizzu kvöldið áður svo minn elskulegi einkaþjálfari var ekki par ánægður með mig. En tók vel á því og fór svo smá í pottinn.

Þegar heim kom tók við "bílskúrsdagurinn mikli", nú átti nefnilega að taka til í bílskúrnum sem ekki er hægt að komast inní fyrir drasli. Fattaði þegar ég var byrjaður að til þess að gera þetta nú af einhverju viti þyrfti ég að losa mig við 2,5 metra langt og 1,2 metra breitt þythokkýborð sem ég keypti um jólin. Hringdi eitt símtal og kom því inná góðvin minn sem ég veit ekki hvort verður góðvinur minn mikið lengi eftir þennan bjarnargreiða  veit ekki hvað konan hans segir á morgun þegar ég sendi það heim til hans. Ætli hann fái ekki bara að gista í bílskúrnum.

Bar á garðinn og fór með garðaúrgang í sorpu svo þetta endaði nú með að vera nokkuð drjúgur dagur.

Sótti svo bræður mína í Laugardalshöll þar sem annar þeirra var að keppa í körfubolta. Úrslitin voru hans liði ekki í hag en ég gaf honum burritos þegar við komum heim með naut og kjúklingi svo hann gleymdi því fljótt. Alltaf gott að gleyma sér í mexíkómat. Allir átu yfir sig nema ég sem fer eftir boðorðum Arnars Grant. Borða oft og lítið í einu.

Á morgun fer ég svo á æfingu ,,með Grantaranum", en ekki hjá Grantaranum. Nú erum við nefnilega líka orðnir æfingafélagar. Þetta verður örugglega einstök upplifun. Svona meistaraþjálfun.